Hafsat Bello Muhammad
Hukumar da ke yaki yi wa tattalin arzikin kasa zagon kasa EFCC ta kwato unguwa guda mai dauke da rukunin gidajen 758 a unguwar Lokogoma da ke Abuja daga hannun wani tsohon jami’an gwamnatin da ake zargin ya ginasu da kudin haram.
Hukumar ta sanar da hakan a shafinta na X Inda tace tun da aka kafa hukumar a shekarar 2003 ba a taba samun gagarumar nasarar kwato kadarorin da aka mallaka ta haramtacciyar hanya ba kamar a wannan karon.
Sanarwar ta kara da cewar karbar mallakin rukunin gidajen ya biyo bayan wani hukunci da mai shari’a Jude Onwuegbuzie ya yanke.
“Kwato kadarorin da mika haƙƙin mallakarsu ga gwamnatin tarayya wani bangaren ne na yunkurin da hukumar EFCC take wajen karya tasirin masu aikata laifi, hakkan yana tabbatar da cewar ba suci gajiyar dukiyar da suka tara ta haramtacciyar hanya ba” a cewar sanarwar.
Da yake yanke hukuncin mai shari’a Onwuegbuzie ya ce tsohon jami’in gwamnatin bai nuna kwarararan hujojin da zai tabbatar da ya mallaki gidajen ta halastacciyar hanya ba hakan yasa aka mika mallakinsu ga gwamnatin tarayya.
Shugaban hukumar, Ola Olukoyede, ya bayyana cewa Idan aka kyale wadanda ake bincika akan cin hanci da rashawa suka samu damar tasarrafi da dukiyar da suka tara za su yi amfani da ita wajen yakar hukumar.
Ya kara da cewar “Don haka manufarmu ta maida hankalin wajen raunana su ta hanyar hana su amfani da dukiyar da suka samu daga laifin da suka aikata.”
EFCC ta kwato unguwa guda mai gidaje 753 daga hannun wani tsohon jami’in gwamnati
