Kungiyar ma’aikatan yada Labarai na Arewa, sun nuna rashin goyon bayansu ga kudirin dokar haraji da ake cece kuce akai.
A wata sanarwa da kungiyar ta fitar a ranar Talata, ta bayyana damuwa da kin amincewa da wasu sassa na kudirin,
Shugaban kungiyar, Abdullahi Yelwa Ajiyan Yawuri, ya ce wasu bangarori a kudirin za su kawo illa ga muradun yankin Arewa da kuma cigaban tattalin arzikin kasa baki daya.
“Kamar yadda masana kan harkokin haraji suka lura, wasu sassa na kudirin, idan aka aiwatar da su cikin hikima, na iya samar da ƙarin kuɗaɗe masu amfani ga cigaban ƙasa.”
Sanarwar ta kara da cewa “Arewa, kamar kowanne yanki na ƙasar nan, tana da haƙƙin bayyana ra’ayi kan kowanne kudiri na gwamnati, musamman wanda take ganin zai zama barazana ga cigabanta.”
Ya yi zargin cewa masu tsara kudirin sun nuna rashin kulawa da damuwar mafi yawan ‘yan Najeriya, musamman Arewa, wadda ke cikin hali na ƙarancin tattalin arziki.
“Akwai tanadi a cikin kudirin da ke tilasta haraji kan gadon kuɗaɗe, wanda ya saba wa koyarwar addininmu da al’adunmu.”
“Haka kuma, rabon kuɗaɗen VAT ga jihohi da Babban Birnin Tarayya (FCT) kamar yadda aka tanada a kudirin, ba adalci bane, kuma zai ƙara ƙuncin bambance-bambancen tattalin arziki tsakanin Arewa da sauran yankuna na ƙasa.”
“Dangane da waɗannan, muna ba da shawarar cewa gwamnatin Shugaba Bola Ahmed Tinubu ta janye kudirin VAT cikin mutunci don samun damar gudanar da karin shawarwari tare da masu ruwa da tsaki,” inji sanarwar.
Kungiyar ma’aiktan yada labarai sun yi watsi da kudirin haraji
