Rundunar ‘yan sandan jihar Kaduna ta sanar da kama wasu mutane biyu da ake zargin masu sayarwa ‘yan ta’adda bindiga ne.
Zubairu Musa mai shekaru 40 da kuma Nasiru Saidu mai shekaru 17, ‘yan asalin karamar hukumar Kankara ne ta jihar Katsina.
Jami’an rundunar ‘yan sanda ta Mobile Force Squadron 47 da ke Zariya ne suka tare wadanda ake zargin a shingen bincike a kan hanyar Zariya zuwa Jos a jihar Kaduna.
Jami’in hulda da jama’a na rundunar ‘yan sandan jihar, ASP Mansir Hassan, a wata sanarwa da ya fitar a ranar Juma’a, ya ce an samu wadanda ake zargin dauke da bindigogi guda takwas, da kuma bindiga hadin gida guda daya da harsashi sittin da biyar.
Ya bayyana cewa wadanda ake zargin suna da hannu wajen safarar makamai ba bisa ka’ida ba.
Kakakin rundunar ‘yan sandan ya ruwaito kwamishinan ‘yan sandan jihar, Ibrahim Abdullahi ya yabawa jami’an da suka mayar da kama wadanda ake zargin cikin gaggawa sannan ya jaddada kudirin rundunar na tabbatar da doka da oda.
Yan sanda a Kaduna sun kama masu safarar bindiga biyu
