Tsohon Mataimakin Shugaban Kasa kuma ɗan takarar shugaban ƙasa na jam’iyyar PDP a shekarar 2023, Atiku Abubakar, ya bayyana a shafukan sada zumunta inda ya wallafa hoton haɗuwarsa da wasu abokan karatunsa a firamare.
A cikin saƙon da ya haɗa da hotonsa tare da abokan karatunsa, ya rubuta:
“Ziyarar da na kai Jada kwanan nan, wata dama ce ta sake haɗuwa da wasu abokan karatuna a Makarantar Firamare ta Jada. Daga hagu: Alh. Bello Shuaibu, Alh. Sama’ila Jauro, ni kaina, da Alh. Dahiru Bobbo.”
A gefe guda kuma, tawagar labaran Atiku ta yi amfani da wannan dama don gorantawa Shugaba Bola Tinubu.
Abdul Rasheed Shehu Uba, mai ba Atiku shawara na musamman kan harkokin yaɗa labarai, ya rubuta wani saƙo dake da danganta da cece-kuce kan takardun karatun Tinubu. Inda Ya ce, “Ba zai yiwu ba ka samu kanka babu abokan karatu, abokan aji ko ’yan uwa — sai dai idan rayuwarka ta kasance cikin sirri da yaudara.”
An yi ta cece kuce kan sahihancin takardun karatun shugaban kasa Bola Tinubu gabannin zaben 2023, abinda ya kai ga dan takarar PDP Atiku Abubakar ya dangana da kotun Koli, sai dai bai yi nasara ba.
Yadda Atiku ya yiwa Tinubu shagube
