Majalisar dattawa ta yi gargadi ga dukkan ma’aikatu da hukumomin gwamnatin tarayya (MDAs), inda ta ce ba za su samu kudin da aka ware musu a kasafin kudin shekarar 2025 ba idan har suka kasa gabatar da bayanan kashe kudaden su na shekarar 2024.
An yi wannan gargadin ne a yayin wani zaman kwamitin binciken majalisar dattijai kan harkokin kudi karkashin jagorancin Sanata Sani Musa (APC, Neja Gabas) a Abuja ranar Litinin.
Zaman ya mayar da hankali ne kan yadda ake fitar da kudaden shiga da ake samu a cikin gida, da kuma yadda ake tafiyar da harkokin kudi gaba daya a Najeriya.
Majalisar dattawan ta nuna rashin gamsuwarta da sabanin da aka samu a cikin bayanan wasu MDAs bayan ta nazarci rahotannin su.
Sanata Musa ya gargadi ma’aikatun da hukumomin hakan ne a jawabinsa bayan tattaunawa da Akanta Janar na Tarayya, Oluwatoyin Madein, cewa duk hukumar da ta gaza bayyana gaban kwamitin majalisar dattijai, ba za ta samu kasafin kudin shekarar 2025 ba.
Majalisar Dattawa ta tabbatar da ba za’a saki kudin duk ma’aiktar da bata gabatar da kanta a gaban ta ba
