Sakataren gwamnatin jihar Bauchi (SSG), Barista Ibrahim Muhammad Kashim, ya ajiye aikinsa bisa dalilai da har yanzu ba a bayyana wa jama’a ba.
Ya ajiye aikin ne ta hanyar wasiƙa da ya aike kai tsaye ga gwamnan jihar Bauchi, Bala Muhammad. Gwamnan ya amince da murabus ɗin Ibrahim Muhammad Kashim daga matsayin SSG nan take, kuma ya masa fatan alheri a rayuwarsa ta gaba.
A cikin sanarwa da kakakin gwamnan, Mukhtar Gidado, ya fitar da yammacin ranar Juma’a, gwamnan ya tabbatar da amincewa da murabus ɗin Ibrahim Muhammad Kashim.
Gwamnan ya kuma umarci shugaban ma’aikatar fadar gwamnatin jihar, Dakta Aminu Hassan Gamawa, da ya ci gaba da kula da harkokin ofishin SSG na riƙon ƙwarya har sai an naɗa sabon sakatare.
Har yanzu ba a san dalilan da suka sa SSG ɗin ya ajiye muƙaminsa ba, wanda ya faru bayan taron gaggawa na majalisar zartarwar jihar da aka yi a ranar Alhamis
Sakataren gwamnatin Bauchi ya ajiye mukaminsa
