A ranar Talata, 17 ga Disamba, 2024, an samu gobara a tashar man fetur ta NNPC da ke kusa da GAB Hotel a titin Ibrahim Taiwo, Kano, wanda yayi sanadiyyar konewar motar daukar mai da ke dauke da lita 45,000 na man fetur.
A cewar sanarwar da hukumar Kashe Gobara ta Jihar Kano ta fitar, kiran gaggawa na farko ya iso ne daga Muhammad Abdullahi da misalin karfe 20:56 na yamma.
A cikin sanarwar, mai magana da yawun hukumar, ACFO Saminu Yusuf Abdullahi, ya bayyana cewa “a lokacin da jami’anmu suka iso wurin da gobarar ta faru, sun tarar da motar daukar mai da ke dauke da man fetur ta Exchange Energy Company ta kama da wuta.”
Sanarwar taci gaba da cewa, “Motar daukar mai ta fara konewa yayin da ake zubar da mai daga cikin rumbun ajiyar mai. Bayan an gama zubar da lita 2,000 daga rumbun na farko, sai gobara ta fara. Lokacin da ake zubar da mai daga rumbun na uku, an zubar da lita 32,000 na PMS kafin wutar ta fara.”
Duk da cewa motar daukar mai da famfo biyu sun kone, jami’an hukumar kashe Gobara sun samu nasarar kashe sauran kayayyaki, ciki har da famfon PMS, da kayayyakin da ke cikin tankin motar daukar mai.
“An dakatar da wutar daga yadawa zuwa wurare masu kusa,” in ji sanarwar.
Gobara ta fara ne lokacin da ake zubar da man fetur zuwa rumbun ajiyar mai na kasa.
Hukumar Cikan Gobara ta tabbatar da cewa ba a samu ragowar hadari ko asarar rayuka ba.
Gobara ta kone motar daukar mai a tashar man fetur ta NNPC
