Elizabeth Nuhu Bawa, uwa ce, tare da ‘yarta mai shekaru 17, Grace Danladi, sun lashe matakin farko da na biyu a tseren gudu na kilomita 21 a bikin Southern Kaduna Festival (SKFEST) da ake ci gaba da gudanarwa.
Grace Danladi ta kasance ta biyu, bayan mahaifiyarta, wadda ta lashe matsayin farko a gasar.
A wata hira, Grace Danladi ta bayyana cewa, ko da yake mahaifiyarta ta fi ta kuzari a tseren, tana fatan ta yi nasara akanta a gasar badi.
Bikin SKFEST, karo na biyu, na da nufin nuna kyawawan al’adun kabilu daban-daban da suke zaune a yankin da ake kira Kudancin Kaduna.
Mr Ferguson Bobai, Shugaban kwamitin shirya taron, ya bayyana cewa taken bikin na bana shi ne, “Preserving Heritage, Igniting Progress” (kare tarihi, da cigaba), an zabe shi ne sakamakon nasarorin da aka samu a karo na farko a shekarar 2023.
Ya kara da cewa, taron zai samar da kyakkyawar dama ga masu halarta na cikin gida da na kasashen waje, tare da tallafa wa ci gaban tattalin arziki, hadin kai na zamantakewa, da kuma nuna al’adun bambancin mutanen yankin.
Bobai ya bayyana cewa an kafa SKFEST ne a 2023 domin farfado da al’adun mutanen kudancin kaduna da kasabaki daya.
‘Ya da uwa sun zo na 1 da na 2 a gasar tsere
