Kungiyar Tuntuba ta Arewa (ACF) ta dawo da shugabanta na kasa da ta dakatar, Mamman Mike Osuman.
Jaridar DAILY POST ta ruwaito cewa ACF ta dakatar da Osuman bayan ya bayyana cewa yankin Arewa ba zai mara wa Shugaban Kasa Bola Tinubu baya a zaben 2027 ba.
Sakataren Janar na Kungiyar, Malam Murtala Aliyu, ya sanar da dawowar Osuman a cikin wata sanarwa da ya fitar ranar Laraba.
Aliyu ya bayyana cewa dage dakatarwar ya biyo bayan shiga tsakani da kwamitin hadin kai, zaman lafiya da sulhu na ACF ya yi, karkashin jagorancin tsohon sakataren gwamnatin tarayya, Dr. Mahmud Yayale Ahmed.
A cewarsa, an warware matsalolin da suka taso cikin ruwan sanyi domin ci gaban yankin Arewa.
“Kwamitin hadin lai, zaman lafiya da sulhu na ACF karkashin jagorancin Dr. Mahmud Yayale Ahmed, CFR, Ajiyan Katagum, ya shiga tsakani a rikicin shugabanci da ya kunno kai a kungiyar.
“Kwamitin ya gayyaci wasu masu ruwa da tsaki, ciki har da shugaban kwamitin amintattu da shugaban mwamitin zartarwa na kasa, da sauran su, inda aka yi wata tattaunawa irin ta gida kan wannan al’amarin.”
“Sakamakon haka, an warware matsalar cikin ruwan sanyi domin ci gaban al’ummar Arewa, kuma dakatarwar an dage ta,” in ji sanarwar.
DAILY POST ta kuma ruwaito cewa kalaman Osuman da suka shafi shugaba Tinubu da zaben 2027 sun jawo suka daga wasu mambobin kwamitin amintattu da na zartarwa na ACF, inda suka zargi shi da kaucewa matsayar kungiyar ta zama maras son siyasa.
Wata sanarwa da sakatare janar na ACF, Malam Murtala Aliyu, da shugaban kwamitin amintattu, Alhaji Bashir Dalhatu, suka sanya hannu tare, ta zargi Osuman da yin magana ba tare da izini ba, inda ya nuna cewa Arewa za ta goyi bayan dan takarar shugaban kasa daga Arewa a 2027.
2027: ACF ta maido shugabanta da ta dakatar, Osuman
