Gwamnatin jihar Niger ta musanta rahoton da ke cewa wasu yan bindiga sun kai wa tawagar gwamna Umaru Bago hari a karamar hukumar Mashegu.
Sakataren gwamnatin jihar, Balogi Ibrahim ne ya musanta rahoton harin a wata sanarwa da ya raba ga menama labarai.
Ya bayyana cewa babu gaskiya a cikin labarin, domin tawagar gwamna Umaru Bago ba ta gamu da harin yan bindiga ba, yayin da gwamnan ke cigaba da duba ayyuka a Niger ta Arewa.
“Tawagar gwamnan ta na yin aikinta lafiya kalau ba tare da barazana ga lafiyarsa ko ta tawagar sa ba,” a cewar sanarwar.
Sanarwar ta kara da cewa jami’an tsaro su na gudanar da aiki dare da rana domin tabbatar da taron dukkanin wadanda ke cikin tawagar duba aikin.
Gwamnatin ta bayyana rashin jin dadinta duba da yadda aka dinga yada labarin karya ba tare da neman sahihin abinda ya faru ba.
Gwamnatin Niger ta musanta cewa yan bindiga sun kai wa tawagar gwamna hari
