Majalisar dattawa ta amince da wani kudirin doka da ke neman kafa sabbin makarantun horar da ƴan sanda a kasar nan.
Amincewa da kudirin ya biyo bayan karbar rahoton kwamitin harkokin yan sanda a zaman majalisar na ranar Laraba.
Shugaban kwamitin, Sanata Abdulhamid Ahmed daga jihar Jigawa ne ya gabatar da rahoton.
Yayin gabatar da rahoton, Ahmed ya ce amincewa da kudirin zai taimaka wajen inganta ayyukan cibiyoyin horarwa kuma a ƙarshe ya ƙara wa jami’an ƴan sanda ƙwarewa don samun kyakkyawan sakamako.
Ya bayyana cewa, kudirin idan aka amince da shi, zai ƙara ƙarfafa jami’an ƴan sanda don aiwatar da nauyin da kundin tsarin mulki ya dora musu.
Da yake tsokaci kan kudurin Sanata Abdul Ningi daga Bauchi ya ce yana da muhimmanci a amince da kudirin, domin zai tallafa wa ƴan sanda wajen ayyukansu kuma ya tabbatar da dorewar su.
Ningi ya jaddada muhimmancin samun ƙwararrun ma’aikata don shugabantar hukumar, yana mai cewa amincewa da kudirin zai samar da horon da ake buƙata ga jami’an hukumar.
Za a kara yawan makarantun horar da yan sanda
