Miss Atsi Kefas, ƙanwa ga gwamnan Jihar Taraba, Agbu Kefas, wacce ‘yan sanda suka harba “da kuskure” yayin da suke kokarin dakile harin ‘yan bindiga, ta rasu.
Wata majiya ta bayyana cewa ƙanwar gwamnan ta rasu a wani asibiti da ke Abuja, inda aka kai ta don samun kulawa ta musamman.
“Ta rasu daren jiya. Gwamna da iyalinsa ba su fitar da wata sanarwa a hukumance ba dangane da rasuwar Atsi Kefas. Muna taya gwamnan da iyalansa jaje a wannan lokaci na alhini,” in ji majiyar ga Leadership.
“Hakika, ƙanwar gwamna jihar Taraba wadda aka harba kwanan nan yayin da take tafiya zuwa Abuja ta rasu,” wata majiyar ta tabbatar.
DAILY POST ta ruwaito cewa Atsi Kefas tana tafiya ne a ranar Alhamis da ta gabata a kan hanyar Kente da ke yankin karamar hukumar Wukari ta jihar lokacin da ‘yan bindiga suka kai mata hari tare da mahaifiyar gwamnan, Jumai Kefas.
Kanwar gwamnan Taraba ta rasu bayan harin ‘yan bindiga
