Jam’iyyar NNPP ta karyata ikirarin an samu baraka da rashin jituwa a cikin jam’iyyar, tana mai bayyana irin wannan zargi a matsayin “karya” da makiya ke yadawa.
Bayan taron shugabannin jam’iyyar na jihohin Kudu maso Kudu a birnin Fatakwal ranar Talata, jam’iyyar ta sake jaddada cewa babu wani rikici a cikin tsarin shugabancinta.
A wata sanarwa da shugabannin suka sanya wa hannu, jam’iyyar ta bayyana cewa mutanen da suka hada da Boniface Aniebonam, Agbo Major, da Oginni Olaposi ba ta dauke su a matsayin mambobinta ba, inda ta ce an dakatar da su tare da kora daga jam’iyyar saboda wasu laifuka.
Shugabanni da suka sanya wa sanarwar hannu, sun hada da Elder Inemisit Akpan (Shugaban Jihar Akwa Ibom kuma Shugaban Shugabannin Jihohi), Joel Tubonimi (Shugaban Jihar Bayelsa kuma Mai Kula da Shugabannin Kudu maso Kudu), Barr. Anthony Ogboriku Odeh (Shugaban Jihar Cross River), Fred Ikponmwosa (Shugaban Jihar Edo), Godson Green (Shugaban Jihar Rivers), da Rex Ogboru (Shugaban Jihar Delta).
“Mun bayyana karara cewa babu rikici a cikin jam’iyyar, kuma wadannan mutane – Dr. Boniface Okechukwu Aniebonam, Dr. Agbo Gilbert Major, Mr. Oginni Olaposi, da abokan su – ba mambobin jam’iyyar NNPP ba ne,” inji sanarwar.
“An dakatar da su kuma an kore su daga jam’iyyar saboda wasu laifuka daban-daban, don haka ba su da wani hurumin da za su yi ikirarin kasancewa mambobi ko kuma wakiltar kansu a matsayin shugabanni na jam’iyyar NNPP.”
Shugabannin sun jaddada cewa tsarin shugabancin jam’iyyar yana nan karkashin jagorancin Dr. Ajuji Ahmed a matakin, Prince Onu Nwaeze a matsayin Mataimakin Shugaban Kasa, Mr. Dipo Olayoku a matsayin Sakataren Kasa, Barr. Ladipo Johnson a matsayin Sakataran Yada Labarai na Kasa, da sauran mambobin kwamitin gudanarwa.
Shugabannin NNPP na Kudu maso Kudu sun nuna godiyarsu ga shugabannin jihohi 36 da kuma na Abuja bisa jajircewarsu ga jam’iyyar.
Sun kuma sake tabbatar da biyayyarsu ga Jagoran Jam’iyyar na Kasa, Sanata Rabiu Musa Kwankwaso, Gwamnan Jihar Kano, Abba Yusuf, Kakakin Majalisar Dokokin Jihar Kano, Jibail Falgore, da kuma mambobin NNPP na Majalisar Dokokin Jihar Kano da na Majalisar Tarayya.
Shugabannin Kudu maso Kudu na NNPP su jaddada mubaya’a ga Kwankwaso
