Hukumar Zaɓe Mai Zaman Kanta ta Ƙasa (INEC) ta bada shawarar canja tsarin zaɓen na Najeriya, inda ta nuna cewa amfani da katin zaɓe (PVC) ba zai zama dole ba a zaɓen gaba.
Da yake jawabi a wani taron tattaunawa na kwata-kwata tare da Kwamishinonin Zaɓe na Jihohi (REC) a Abuja a ranar Alhamis, Shugaban INEC, Farfesa Mahmood Yakubu, ya bayyana cewa ana iya maye gurbin PVC da takardun zaɓe da kwamfuta ta ƙirƙira domin tantance masu kada kuri’a.
Ya jaddada cewa bai kamata a dogara da PVC kawai ba wajen tantance cancantar masu kada kuri’a.
Yakubu ya bayyana cewa shigar da tsarin tantance masu zaɓe na BVAS zai iya sauƙaƙa tsarin zaɓe tare da ƙara ingancinsa
Ya kara da cewa, bayan kammala zabukan kananan hukumomi da zabukan gama gari na 2023, wannan lokaci ne mafi dacewa don aiwatar da sauye-sauye bisa ga nazarin zabukan da suka gabata.
Ya ce, “Tare da amfani da BVAS, ya kamata a sake duba amfani da katin zabe (PVC) a matsayin hanya tilo na tantance masu kada kuri’a.
Masu kada kuri’a za su iya amfani da katin zabe idan suna da shi, amma nan gaba, takardun da aka fitar daga kwamfuta ko aka sauke daga shafin hukumar za su wadatar wajen tantance masu kada kuri’a.”
Wannan sauyi da ake shirin yi, in ji Yakubu, ba kawai zai rage kudin gudanar da zabe ba, har ma zai magance matsalolin rabon katin zabe da kuma hana siyan katin zabe da ake amfani da shi wajen hana mutane kada kuri’a.
INEC na shirin ba da damar kada kuri’a ba tareda katin zabe ba
