Hedikwatar tsaro (DHQ) ta ce sojoji sun kashe ‘yan ta’adda 181, sun kama 203 ciki har da wani dan bindiga mai suna Mohammed Musa a jihar Filato a cikin makon da ya gabata.
A wata sanarwa da daraktan yada labaran rundunar, Manjo Janar Edward Buba ya fitar, ya ce sojojin sun kubutar da mutane 161 da aka yi garkuwa da su, tare da kama wasu mutane 50 da ake zargin barayin mai ne, hadi da kwato kayayyakin sata da suka kai N728.2m.
Ya ce sojojin sun kwato makamai iri-iri 228 da alburusai iri-iri 6,749 a cikin makon da ake nazari a kai.
A yankin Neja-Delta kuwa sojojin sun gano tare da lalata haramtattun matatun man fetur guda 47 da tankunan ajiya 44. Sauran kayayyakin da aka kwato sun hada da jiragen ruwa masu guda shida, ganguna 48, babura uku, da wayar hannu daya da motoci 12 da sauransu.
Sojojin sun kwato lita 765,680 na danyen mai da aka sace da kuma lita 86,725 da aka tace ba bisa ka’ida ba.
Sojoji sun kashe yan ta’adda 181 a mako guda
