Gwamnan jihar Kaduna, Uba Sani, ya nada Kabiru Yakubu Jarimi a matsayin mai ba shi shawara na musamman kan harkokin kananan hukumomi.
Ibrahim Musa, babban sakataren yada labarai na gwamna Sani ne ya sanar da nadin a wata sanarwa a ranar Asabar.
Jarimi shi ne tsohon shugaban karamar hukumar Kaduna ta Kudu.
Yana da digiri na biyu a fasahar bayanai, digirin difloma na biyu, da digiri na farko a kimiyyar kwamfuta.
Musa ya ce nadin Jarimi ya yi daidai da shirin gwamnatin jihar na sauya fasalin karkara.
“Kabiru Yakubu Jarimi gogaggen jami’in gwamnati ne kuma shugaba mai hangen nesa. Ya yi wa’adi biyu a matsayin zababben ahugaban karamar hukumar Kaduna ta Kudu,” in ji sanarwar.
“An san shi da kaddamar da manufofin da suka mai da hankali kan al’umma, samar da ci gaban da zai dore, da inganta ayyukan al’umma.
“Sabon mai ba da shawarar yana da kwarewa a jagorancin dabarun tsarin mulki, manufofin gwamnati da warware rikice-rikice, karfafa matasa da bunkasar tattalin arziki, da kuma gudanar da harkokin kudi.
“Jagorancinsa ya yi fice wajen samar da hadin guiwa tsakanin bangarori daban-daban don bunkasa tsaro, ilimi, kiwon lafiya, da ayyukan jin kai.
“Yayin da gwamnatin Jihar ke kara hanzarta shirin sauya fasalin karkara tare da gina kananan hukumomi, gwamna Uba Sani na daukar kwararru don aiki da su.”
“Yayin da yake rokon Kabiru Jarimi da ya sauke nauyinsa da jajircewa da adalci, Gwamnan yana masa fatan shiriya da kariyar Allah,” inji sanarwar.
Nadin ya fara aiki nan take.
Gwamna Sani ya nada sabon mai ba shi shawara kan harkokin karkara
