Babban jami’in kamfanin Air Peace, Allen Onyema, ya yi kira ga ‘yan Najeriya da su ba wa gwamnatin shugaba Bola Tinubu lokaci, yana mai cewa shugaban ya na kokarin daidaita harkokin kasuwanci ta hanyar manufofin tattalin arzikinsa.
Onyema ya yi wannan bayani yayin wata ganawa da Shugaba Tinubu a fadar gwamnati da ke Abuja, inda ya yaba wa shugaban kasar kan kokarinsa na aiwatar da manufofin da ake fatan za su daidaita harkokin kasuwanci a fadin Najeriya.
Ya jaddada cewa shugaban kasa ya samu nasarori masu yawa wajen saukaka gudanar da harkokin kasuwanci a bangaren sufurin jiragen sama, yana kuma nuna gamsuwarsa da sabbin sauye-sauyen da ministan sufurin jiragen sama, Festus Keyamo, ya bullo da su.
Onyema ya ce: “Shugaban kasa dan kasuwanci ne kuma yana kokarin daidaita harkokin kasuwanci ta hanyar manufofinsa, amma mutane ba su gane haka ba. Wasu daga cikinmu da muke kasuwanci mun fahimci abin da shugaban kasa yake kokarin yi. Abin da yake yi shi ne gyara tsarin Najeriya. Mutane da yawa suna ganin gyaran tsarin kasa yana nufin raba kasar zuwa shiyya-shiyya, amma abin da Tinubu ke yi shi ne gyaran tsarin na gaskiya ta hanyar sauya yadda ake gudanar da al’amura a kasar don samun sakamako mai kyau a nan gaba.”
Onyema ya kara da cewa duk da cewa tattalin arzikin na fuskantar kalubale, sauye-sauyen da Tinubu ke yi za su amfani kasar nan gaba.
Shugaba Tinubu ya na kokarin daidata tattalin arziki – Onyema
