Shugaban hukumar zabe ta kasa (INEC) Farfesa Mahmood Yakubu, ya musanta rade-radin da ake na cewa ya rasu, yana mai cewa yana raye kuma cikin koshin lafiya.
Yakubu ya bayyana haka ne cikin wata sanarwa da aka sanya wa hannu a madadinsa ta hannun Rotimi Oyekanmi, jami’in hulda da jama’a na musamman na hukumar.
Wasu kafafen sada zumunta ne dai suka ruwaito cewa shugaban ya rasu a wani asibiti da ba a bayyana sunansa ba a birnin London, bayan ya kamu da wata cuta.
Amma a martaninsa, Yakubu ya bayyana cikin sanarwar cewa: “An jawo hankalina game da labarin karya da aka yada a wani sashe na kafafen sada zumunta wanda ke cewa na mutu, a asibitin London. Wannan labari ya fara bayyana ne a ranar Litinin, 9 ga Disamba 2024.
“Muna rokon jama’a da suyi watsi da wannan rade-radi. Farfesa Yakubu yana raye, yana lafiya, kuma yana cikin koshin lafiya.
Sanarwar tace a lokacin farfesan yana halartar taro da da kwamitin majalisar wakilai kan al’amuran zabe a ranar Laraba, 11 ga Disamba 2024.
Haka nan, ya jagoranci taron hukumar da kwamishinonin zabe na jihohi a ranar Alhamis, 12 ga Disamba, 2024.
Ban mutu ba – Shugaban hukumar INEC
