Gwamnatin Jihar Legas, ta hannun Hukumar Tsaro da Kashe Gobara, ta kaddamar da wayar da kan al’umma kan hanyoyin dakile tashin gobara a kasuwanni.
A cewar wata sanarwa da aka fitar ranar Talata, wannan wayar dakai an shirya shi ne domin hana aukuwar gobara a kasuwanni yayin wannan lokacin sanyi da kuma yayin da mazauna jihar ke shirin bukukuwan karshen shekara.
Shugaban Hukumar Tsaro ta Jihar Legas, Lanre Mojola, yayin kaddamar da gangamin a kasuwar Jankara da ke Tsibirin Legas, ya jaddada muhimmancin kula da tsaro ga ‘yan kasuwa domin gujewa hadurran gobara.
Ya bayyana cewa wannan wayar da kan ya mayar da hankali ne kan kare gobara, musamman a wannan lokacin sanyi.
“Saƙon shine ku kasance masu kula yayin gudanar da harkokinsu. Rashin kula babbar matsala ce, domin kuskuren ɗan adam da rashin kula su ne manyan dalilan tashin gobara,” in ji shi.
Shugaban Ƙungiyar Masu Sayar da Agogo a Kasuwar Jankara, Abdul Yusuf, ya gode wa gwamnatin Jihar Legas ta hannun Hukumar Kashe Gobara bisa ci gaba da kawo gangamin wayar da kai a kasuwa domin hana aukuwar gobara.
Bayan kasuwar Jankara, tawagar ta kuma shirya ziyartar kasuwannin Balogun, Dosunmu Ereko, Saabo, Mile 12, Ojuwoye, Tejuosho, Boundary, Alaba International, Iyana Iba da Okokomaiko.
Gwamnatin Jihar Legas ta fara yakin dakile tashin gobara a kasuwanni
