Hukumar Zaɓe ta Ƙasa (INEC) ta maido da Sylvester Ezeokenwa a matsayin shugaban jam’iyyar All Progressives Grand Alliance (APGA) na ƙasa.
Kwamishinan INEC kuma Shugaban Kwamitin Ilimin Zabe, Sam Olumekun, ya bayyana wannan a cikin wata sanarwa da ya fitar ranar Talata.
Yace hukuncin da hukumar ta yanke ya biyo bayan hukuncin Kotun Koli da aka miƙa wa hukumar.
Olumekun ya bayyana cewa, a taron da hukumar ta gudanar a ranar, an tattauna matsalar rikicin shugabanci mai tsawo a cikin jam’iyyar APGA, wanda ya kasance babban batu a cikin shari’o’in kotu.
Olumekun ya ce, bisa hukuncin kotu, hukumar yanzu ta amince da Barr. Sylvester (Sly) Ezeokenwa a matsayin Shugaban APGA.
“An isar da hukuncin Kotun Kolin da lambar daukaka kara SC/CV/824/2024 APGA & ANOR vs OYE & ORS, wanda aka yanke ranar 27 ga Nuwamba, 2024, wanda ya amince da Barr. Sylvester (Sly) Ezeokenwa a matsayin Shugaban jam’iyyar,” a cewar sanarwar.
“Bisa ga hukuncin kotun mafi girma, hukumar ta dawo da Barr. Ezeokenwa a matsayin shugaban APGA kuma ta dawo da sunansa a shafinta na yanar gizo kamar yadda ya kamata.”
Hukuncin Kotun Kolin, wanda aka yanke a ranar 27 ga Nuwamba, 2024, ya tabbatar da Barr. Ezeokenwa a matsayin Shugaban kasa na APGA.
INEC ta amince da Ezeokenwa a matsayin shugaban APGA
