Majalisar dokokin Kano ta fara yunkurin gyaran dokar da ta kafa hukumar kashe gobara ta shekara 1970 a jihar, domin lura da ayyukan cibiyoyin sayar da gas.
Majalisar tace zata samar da wani sashe a dokar da zai kayyade ayyukan masu sayar da Gas a cikin birnin Kano.
Wannan dai ya biyo bayan amincewa da binciken rahoton kwamitin ayyuka na musamman wanda ya koka kan yadda ake sayar da gas ba bisa ka’ida ba.
Shugaban kwamitin, Abdullahi Yahaya dan majalisa mai wakiltar karamar hukumar Gezawa yace hukumar kashe gobara ta samu rahotanni haramtattun wuraren sayar da gas 475.
Tunda farko, dan majalisa mai wakiltar karamar hukumar Kura, Tasiu Abubakar ne ya nemi majalisar da dauki mataki kan yadda ake sayar da gas barkatai, abinda ke jefa rayuwar al’umma cikin hadari.
Majalisa ta kuma shawarci gwamnatin Kano da ta samarwa masu sana’ar gas din mazauni na din din domin kebancesu daga jama’a kamar yadda aka yiwa masu sayar da wayar hannu da kuma masu sayar da magunguna.
Wuraren da aka bada shawarar girke masu gas din sun hada da titin Hadeja da titin Maiduguri da titin Zariya da titin Madobi da titin Gwarzo sai titin Katsina.
A kebe masu sayar da gas daga cikin jama’a – Majalisar Dokokin Kano
