Hukumar Kula da Ayyukan ‘Yan Sanda ta amince da korar manyan jami’ai 18 da rage matsayin wasu 19 saboda rashin da’a da suka nuna.
Kakakin Hukumar Ikechukwu Ani, ya bayyana wannan a cikin wata sanarwa a ranar Juma’a a Abuja.
Ani ya ce, a taron farko na duba lamurra da hukumar ta yi a Abuja, an yanke hukunci kan shari’o’in ladabtarwa guda 109 da suka makale, tare da shari’u na ƙorafe-ƙorafe da roƙon daukaka kara guda 23, da kuma hukuncin kotu guda 13 da ake buƙatar a bi umarnin su.
Ya bayyana cewa hukumar ta yi la’akari da kuma amincewa da shawarwari kan lamurran haɓaka matsayin jami’an ‘yan sanda da Sufeto Janar na ‘Yan Sanda ya miƙa mata don aiwatarwa.
Ani ya ce taron ya samu shugabancin Shugaban hukumar Hashimu Argungu.
Manyan jami’an da aka kora sun haɗa da Mataimakan Sufritanda 10, Mataimakan Sufritanda na biyu guda shida, Babban Sufritanda guda biyu, da Sufritanda ɗaya.
“Hukumar ta kuma amince da rage matsayin wasu manyan jami’an ‘yan sanda guda 19, wanda suka haɗa da Mataimakin Kwamishinan ‘Yan Sanda guda ɗaya, Babban Sufritanda guda ɗaya, Sufritanda guda biyu, Mataimakan Sufritanda na biyu guda biyu, da Mataimakan Sufritanda guda 13,” in ji shi.
Ani ya ce PSC ta hukunta Mataimakan Sufeto-Janar na ‘Yan Sanda guda biyu; ɗaya ya samu kakkausar gargaɗi saboda ƙin bin umarni na doka, yayin da ɗayan ya samu wasiƙar gargaɗi saboda sakaci.
Mai magana da yawun hukumar ya ce an hukunta sauran jami’an da aka samu da laifi ta hanyoyi daban-daban.
An kori manyan jami’an yan sanda 18 daga aiki
