Wani dan majalisar wakilai da aka zaba a karkashin jam’iyyar LP, Daniel Chollom, ya sanar da sauya sheka zuwa jam’iyyar APC.
Chollom ya bayyana matsayar sa a ranar Talata, yana mai zargin rikicin shugabanci da ya dabaibaye LP ne ya sa shi barin jam’iyyar.
Ya kara da cewa rikicin ya hana shi samun damar hada kai da kowanne bangare na jam’iyyar.
Cikin wata wasika da kakakin majalisar wakilai, Abbas Tajudeen, ya karanta yayin zaman majalisa, Chollom ya bayyana cewa rikicin cikin gida a LP ya sa ya yi nazari kuma ya ga cewa zai fi amfani ga mutanensa idan ya koma APC.
Ya kara da cewa yana sauya sheka ne domin ya goyi bayan shugaban kasa, Bola Tinubu, wajen tabbatar da ci gaban kasa da raba alfanun dimokuradiyya ga al’ummar Najeriya.
Sai dai, Mataimakin Bulaliyar Karamar Jam’iyya, George Ozodinobi, ya sukar masu barin LP, yana cewa suna nuna rashin akida.
Ya kuma yi kira da a ayyana kujerar Chollom a matsayin wadda ba ta da mai rike da ita.
An samu karin dan majalisar LP ya sauya sheka zuwa APC
