Babban Akanta na Jihar Edo, Mista Julius Anelu, ya bayyana cewa bashin cikin gidan da ake bin gwamnatin ya kai Naira tiriliyan 1 yayin da bashin kasashen ketare ya kai Naira biliyan 282.
Ya danganta karuwar kudaden basussukan da aka samu da faduwar darajar Naira.
Babban Akantan ya bayyana hakan ne a wata ganawa da ya yi da mambobin kwamitin tantance kadarorin jihar Edo. A cewarsa, ofishinsa ya rubutawa dukkan bankunan da ke hulda da gwamnatin jihar takardar bukatar jawabin hada hadar kudin su domin ya gabatar da su ga kwamitin.
“Ma’aikatar kasafin kudi da tsare-tsare za ta bayyana a gaban kwamitin don bayyana yadda ake tafiyar da kasafin kudin jihar tun daga shekarar 2017,” Anelu ya jaddada
Anelu ya yi alkawarin bai wa kwamitin duk wasu muhimman takardu da suka dace domin su gudanar da ayyukan su cikin sauki.
Ana bin jihar Edo bashin triliyan 1.283 – Babban Akantan jihar
