Dan majalisar wakilai, wanda ke wakiltar mazabar Albasu/Gaya/Ajingi karkashin NNPP Kano, Hon. Ghali Mustapha, ya ce kudirorin gyaran haraji za su cutar da al’umma.
Da yake magana da manema labarai a Abuja a ranar Litinin, Hon. Mustapha, ya ce kudirorin, idan aka mayar da su doka, za su kara tabarbarewar tattalin arzikin Najeriya.
Dan majalisar ya ce shi da takwarorinsa za su yi duk mai yiwuwa don hana kudirin zama doka.
“Yanzu haka, manufofin wannan gwamnati suna da tsauri sosai, kuma suna sabawa muradun talakawa,” in ji Mustapha.
“Yadda suka kawo batun gyaran haraji don tattaunawa—ina ganin sun yi kuskure.
“Ba mu san wanda ke bayan wannan kudirin gyaran haraji ba. Mun sani cewa bangaren zartarwa yana nan daram kan ganin an tabbatar da kudirin, amma za mu yi bakin kokarinmu don hana shi wucewa.
“Kuma zan tabbatar muku da cewa yawancin mambobin da na yi magana da su ba su goyon bayan wannan kudirin, saboda abin da ya fi muhimmanci yanzu shi ne yadda za a samar da abinci ga talakawa.
“Ta yaya za a magance matsalar rashin tsaro? Ta yaya za a samar da ingantaccen ilimi? Ta yaya za a samar da ayyukan yi? Wannan shi ne abin da muke tunani.
Hon. Ghali Mustapha ya shawarci bangaren zartarwa da ya ajiye maganar kudirin harajin saboda amfanin talakawa.
Ba za mu bar kudirin haraji ya zama doka ba – Hon. Ghali Mustapha
