Kwamitin Majalisar Wakilai kan Tsaro ya nemi a samar da isasshen kudade ga Hukumar Binciken Tsaro ta Kasa (DIA) domin ta iya aiwatar da aikinta yadda ya kamata.
Shugaban kwamitin, Babajimi Benson, ya yi wannan kiran ne lokacin da ya jagoranci mambobin kwamitin a ziyara ta farko ta duba ayyukan Hukumar Binciken Tsaro ta Kasa (DIA) a hedkwatarta da ke Abuja.
Benson, wanda ke wakiltar Mazabar Ikorodu a Jihar Legas a Majalisar Wakilai, ya bayyana cewa hukumar tana da matukar muhimmanci wajen tsarin tsaron kasar, inda ya kara da cewa, da samar da isasshen kudade, za ta taimaka sosai wajen magance kalubalen tsaro da Najeriya ke fuskanta.
“A Najeriya, akwai hukumomi uku da ke tattara bayanan sirri – Hukumar Tsaron Ƙasa (DSS), Hukumar Binciken Ƙasa (NIA), da Hukumar Binciken Tsaro ta Kasa (DIA). Mun duba kasafin kudin dukkanin wadannan hukumomi uku, kuma mun yarda cewa DIA ya kamata ta samu karin kuɗi saboda ba kawai tana kula da tsaron cikin gida, wanda hakan ya bai wa sojoji damar shiga, har ila yau tana ba da bayanan sirri daga cikin ƙasa da kuma daga ƙasashen waje.
“Hukumar DIA ita ce kadai da ke da wannan nauyi biyu. DSS tana aiki ne kawai a Najeriya, NIA tana aiki ne a waje, amma DIA tana aiki a duka. Amma idan ka duba kasafin kudin wadannan hukumomi guda uku, abin mamaki ne ganin cewa DIA ita ce ke samun mafi ƙanƙanta.”
An kafa DIA a shekarar 1986 da manufar samar da ingantaccen tsarin tattara bayanan tsaro na sojojin Najeriya da Ma’aikatar Tsaro.
Hukumar tana tallafawa manufofin tsaron Najeriya, tana karfafa hadin gwiwar sojoji da kasashen duniya, tana kare rayukan ‘yan Najeriya, sannan tana tabbatar da lafiyar iyakokin kasar.
Babajimi Benson ya nemi karin kudi ga hukumar binciken tsaro ta kasa
