Shugaban Majalisar Dattawa, Godswill Akpabio, ya jaddada aniyar majalisar na ci gaba da aiwatar da ayyukan majalisa kan kudurorin sake fasalin haraji.
Wannan na zuwa jim kadan bayan mataimakinsa Sanata Barau Jibrin ya sanar Dakatar da kudurin har sai bayan kwamitin ya kammala tattaunawa ya bayar da rahotonsa.
Akpabio wanda ya jagoranci zaman majalisar a ranar Alhamis, ya bayyana cewa kwamitin da Sanata Abba Moro ya ke jagoranta, wanda aka kafa domin tattaunawa da babban mai shari’a na tarayya (AGF) a kan abubuwan da suka shafi kudirorin, na daga cikin tsarin ayyukan cikin gida na Majalisar.
Ya kara da cewa, “Da zarar kudirin doka ya tsallake karatu na biyu a majalisar dattawa, to za’a cigaba da aiki akansa. Sannan ya rage ga kwamitin kudi ya fara tuntubar juna tare da gudanar da taron jin ra’ayin jama’a.”
Tun da fari, Shugaban masu rinjaye, Sanata Opeyemi Bamidele da ke wakiltar Ekiti ta Tsakiya ne ya kawo hankalin majalisar game da batun da ake yadawa cewar sun jingine aiki akan kudurin.
Bamu jingine kudirorin gyaran haraji ba- Majalisar Dattawa
