Gwamnan jihar Kaduna, Sanata Uba Sani, ya ba wa ‘yan kwangilar da ke gudanar da aikin titin Ungwan Rimi-Kafanchan a cikin garin Ƙafanchan, karamar hukumar Jema’a ta jihar, wa’adin makonni shida su kammala aikin.
Wa’adin na kunshe a cikin wata sanarwa da babban daraktan hukumar kula da hanyoyi ta jihar Kaduna (KADRA), Abdullahi Baba Ahmed, ya fitar bayan ya jagoranci tawagar sa-ido kan ayyukan gwamnatin a zuwa Kudancin Kaduna don duba ayyukan da ake gudanarwa a yankin.
Wasu daga cikin ayyukan da aka duba sun hada da titin mai layi biyu na Ungwan Rimi-Kafanchan mai tsawon kilomita 11.8, titin Madauci-Madakiya-Kafanchan mai tsawon kilomita 22.5, titin Godogodo-Kibam-Gwantu mai tsawon kilomita 22.8, Cibiyar Koyon Sana’o’i (Southern Kaduna Centre) da ke Zonkwa, da aikin gadoji.
Tun a shekarar 2020, gwamnatin Jihar Kaduna a karkashin Nasir El-Rufai ta fara aikin ci gaban birnin Kafanchan wanda ya hada da sake gina da fadada titin mai tsawon kilomita 26.3 a kan kudi Naira biliyan 12.8 a yankin.
A watan Janairu na shekarar 2022, tsohon Shugaban Ƙasa Muhammadu Buhari ya kaddamar da tituna 3 daga cikin ayyukan tituna 21 a Kafanchan.
Gwamna Sani ya ba yan kwangila makonni 6 su kammala aikin titin Kaduna
