Gwamnan jihar Zamfara, Dauda Lawal, ya yi sauye-sauye a cikin majalisar zartarwa ta jihar tare da rantsar da sabon kwamishina, Kasimu Sani Kaura.
Gwamnan ne ya jagoranci zaman majalisar zartarwa a ranar Litinin, inda aka yi rantsuwar sabon kwamishinan.
Sanarwa da mai magana da yawun gwamnan, Sulaiman Bala Idris, ya fitar ta bayyana cewa gwamna Lawal ya yi sauyi kaɗan a cikin ma’aikatu.
An kuma bayyana cewa nadin Kaura ya biyo bayan murabus din Mannir Muazu Haidara daga mukamin kwamishina, bayan da aka zabe shi a matsayin shugaban karamar hukumar Kaura Namoda ta jihar.
A yayin rantsar da sabon kwamishinan, gwamnan ya bayyana cewa zaɓen Kaura ya dogara ne kan ƙwarewarsa wajen hidima ga al’ummarsa da jihar baki ɗaya.
Gwamnan ya ce: “Nadinsa tabbaci ne na jajircewar wannan gwamnatin wajen ci gaba da cin moriyar ƙwarewa da ilimin ‘yan jihar da suka sadaukar da kansu don gaggauta isar da ribar dimokuraɗiyya ga mutanen Zamfara.
“Na yi kira ga sabon kwamishina da ya sake jajircewa wajen hidima ga jama’a. A matsayin memba mai muhimmanci a shirin cetonmu, ba ni da shakka cewa zai bayar da gudunmawarsa don amfanin kowa da kowa,” inji gwamnan.
Haka kuma an yi sauye-sauye a gwamnatin inda su ka haɗa da;
“Sabon kwamishina, Kasimu Sani Kaura, zai jagoranci Ma’aikatar Muhalli da Albarkatun Ƙasa, wanda ya maye gurbin Hon. Mahmud Mohammed Abdullahi, wanda aka mayar da shi zuwa Ma’aikatar Bayanin Labarai da Al’adu.
Hon. Nasiru Ibrahim Zurmi ya karɓi shugabancin Ma’aikatar Gidaje da Cigaban Birane, inda ya maye gurbin Hon. Kabiru Moyi, wanda aka tura zuwa Sashen Sa-ido kan Ayyuka da Gudanar da Su.
Dr. Nafisa Muhammad ta koma Ma’aikatar Lafiya, ta maye gurbin Dr. Aisha M. Za Anka, wadda yanzu ita ce Kwamishinar Ma’aikatar Harkokin Mata da Cigaban Zamantakewa.
“Duk al’amuran miƙa mulki su kammala cikin kwanaki bakwai. Ina sake tunatar da ku cewa zan ci gaba da sa ido da kuma tantance ayyukan dukkan masu rike da mukamai yayin da muke kusantar tsaka-tsaki na wa’adin mulki. Mu yi amfani da wannan lokacin wajen sake jajircewa don hidima ga Jihar Zamfara,” in ji gwamnan.
Gwamnan Zamfara ya naɗa sabbin kwamishinoni, ya yi garambawul
