Gwamnatin Tarayya ta yi gargadi ga asibitocin kasar nan da sauran cibiyoyin lafiya su kasance cikin shiri kan sabon nau’in cutar COVID-19 na XEC, dake cigaba da bazuwa cikin sauri.
Biyo bayan yaduwar sabon nau’in XEC na cutar COVID-19 da aka gano a kasashe 29 a duniya, gwamnatin tarayya ta umarci dukkan shugabannin likitoci da daraktoci na asibitocin koyarwa da su gaggauta zama cikin shiri.
A wata sanarwa mai kwanan wata 5 ga Disamba, 2024, Shugaban Sashen asibitocin koyarwa da babban sakataren ma’aikatar, Dakta O.N. Anuma, ya sanar da cewa sabon nau’in na cigaba da yaduwa fiye da sauran nau’ikan da ke yawo, lamarin da ke haifar da damuwa game da tasirinsa ga lafiyar jama’a.
“Ya kamata a gaggauta tsaurara matakai a fadin asibitocinmu domin kare marasa lafiya da kuma kula da wadanda ke da alamun cutar COVID-19.
Sanarwar ta bukaci masu ruwa da tsaki da su isar da sakon ga sauran jama’a domin su kara lura’ domin Samun bayanai cikin lokaci tsakanin masu ruwa da tsaki, ciki har da na’aikatar lafiya ta tarayya, zai kasance mai matukar muhimmanci wajen samun ingantaccen tsari.
A 2020 duniya ta shaida daya daga cikin bala’oi mafi muni a tarihi, bayan bullar cutar Covid-19 da tayi sanadiyyar mutuwar dubban mutane, tare da durkusar da tsarin kula da lafiya na kasashe masu tasowa.
Gwamnati ta gargadi asibitoci su kwana da shirin sabuwar cutar COVID-19
