Gwamnatin jihar Borno ta samu nasarar rage yawan yara da basa zuwa makaranta daga fiye da miliyan 2.2 zuwa kusan 700,000, wanda ke nuni da nasarar 70%.
Gwamna Babagana Umara Zulum ya bayyana wannan nasara ne a ranar Talata a Maiduguri yayin bude makarantar sakandare ta gwamnati Mairi tare da saraktan Bankin Duniya a Najeriya, Dr. Ndiame Diop.
A cikin shekaru biyar da suka gabata, gwamnatin Zulum ta gudanar da manyan ayyuka a fannin ilimi.
Inda ta gina makarantun 104, ta gyara dakunan karatu 2,931 kuma ta rarraba miliyoyin kayan koyarwa a makarantun firamare da sakandare a fadin jihar.
Gwamna Zulum ya kara da cewa, “Mun kafa cibiyoyin koyon sana’o’i guda biyar, makarantu guda biyu na mata/matasa yara da suke koyon sana’o’i da kuma dawo da cibiyoyin koyon sana’a guda tara. Manufarmu ita ce koyar da kusan ‘yan kasuwa 5,000 a kowace shekara, mu basu kwarewa don dogaro da kai da kuma magance matsalar rashin aikin yi.”
Gwamnan ya gode wa Bankin Duniya saboda rawar da ya taka wajen tallafawa ci gaban jihar Borno ta hanyar ayyuka kamar su ‘Multi-Sectoral Crisis Recovery Project (MCRP), Adolescent Girls Initiative for Learning and Empowerment (AGILE), Better Education Service Delivery for All (BESDA),’ da dai sauransu.
Gwamnatin Borno ta rage yawan yara
