Gwamnatin jihar Yobe ta dauki nauyin sojojin da ’yan banga don kare manoma da amfanin gonakinsu a jihar.
Manoma a kananan hukumomin Gujba, Damaturu, Karasuwa, da Gashua suna gama da sintirin sanya idanu akan gonakinsu domin kula da amfanin gonakinsu a wannan kakar daga fadawa hannun ‘yan ta’adda.
Da yake jawabi ga manema labarai bayan taron tsaro na jihar wanda mataimakin gwamnan ya jagoranta, mai baiwa gwamna shawara na musamman kan harkokin tsaro, Birgediya Janar Abdulsalam Dahiru (Rtd) ya ce gwamnatin jihar ta dauki matakin shawo kan matsalar.
Ya ce gwamnatin jihar ta yanke shawarar hada sojoji da ’yan banga don kare amfanin gona daga batagarin musamman la’akari da yanda matsalar tsaro ta ta’azzara a yankin.
Dahiru ya ce an samar da babura 70 don amfanin jami’an soji da kungiyoyin mafarauta da ’yan banga da ke sintiri a daukacin yankunan da abin ya shafa domin kare amfanin gona da manoma daga barayi da ‘yan ta’adda.
Ya ce an kwashe watanni uku ana gudanar da wannan aiki kuma za a ci gaba da gudanar da aikin har zuwa watan Janairun shekarar 2025 inda manoma za su kwashe dukkan amfanin gonakin da aka girbe.
Gwamnatin Yobe ta dauki sojoji da ‘yan banga don bawa manoma kariya a kakar bana
