Babbar kotun tarayya da ke Maitama ta ba da umarnin tsare tsohon gwamnan jihar Kogi, Yahaya Bello, gidan ajiya da gyaran hali ta Kuje, Abuja, har zuwa lokacin da za a yanke shawara kan buƙatar belinsa.
A cewar hukuncin kotun, Bello na iya ci gaba da zama a kurkuku har zuwa ranar 29 ga Janairu, lokacin da kotun ta dage az a ci gaba da sauraron karar da ake masa.
Bello na fuskantar shari’a tare da wasu mutum biyu kan zargin zambar kudi N110bn da EFCC ta shigar gaban kotu.
A wani hukunci da Mai Shari’a Maryanne Anenih ta yanke a ranar Talata, ta ce buƙatar belin Bello ba ta cika sharuddan da suka dace ba.
Mai shari’ar ta bayyana cewa an gabatar da bukatar ne tun kafin Bello ya shiga hannun jami’ai ko kuma ya bayyana a gaban kotu.
Ta ce:
“Saboda haka, wannan buƙatar, kasancewar an gabatar da ita a cikin gaggawa, an yi watsi da ita.”
An gabatar da buƙatar belin Bello a ranar 22 ga Nuwamba, kafin ya shiga hannu a ranar 26 ga Nuwamba da gurfanar da shi a ranar 27 ga Nuwamba.
Kotu ta aika tsohon gwamnan Kogi, Yahaya Bello gidan yari zuwa sabuwar shekara
