Kungiyar Voices Beyond Silence Initiative (VOBSI) tare da hadin gwiwar Center for Gender Studies, ta shirya taro domin tattauna hanyoyin magance matsalar cin zarafin jinsi (GBV) a jihar Kano.
An gudanar da taron a ranar Lahadi, a cikin Center for Gender Studies da ke Jami’ar Bayero, Kano (BUK).
Mariya Shu’aibu, wanda ta kafa wannan kungiya, ta bayyana cewa an kafa wannan kungiya ne domin nemo mafita game da yadda za a magance matsalar cin zarafi, wanda ta ce yana dada karuwa a Kano.
Shu’aibu ta bayyana damuwarta kan yadda cin zarafi ya karu, tana mai cewa, “Yawanci ana magana ne kan yadda za a magance matsalar, amma har yanzu ana samun karin karuwar cin zarafi musamman a Kano, ciki har da cin zarafin maza.”
Ta kara da cewa kungiyarta za ta tabbatar da yin duk mai yiwuwa wajen rage matsalar ta hanyar yin hadin gwiwa da hukumomi da sauran masu ruwa da tsaki don ganin an rage cin zarafi zuwa mafi karanci.
Sulaiman Yar’adua, shugaban sashen Telebijin da Radiyo na Jami’ar Bayero, ya bayyana cewa an shirya taron ne don mayar da hankali kan matsalar GBV da kuma samar da hanyoyin magance ta cikin al’umma.
Ya gargadi jama’a da su daina kare masu aikata irin wadannan laifuka, domin hakan yana kara musu karfin gwiwar cigaba da aikata su.
“Dole ne masu aikata laifin su fuskanci hukunci gwargwadon doka, ba tare da an yi wata sulhu ba,” in ji Yar’adua
Mal. Abdullahi Shehu, mai kula da hakkin dan adam a Kano, ya bayyana cewa cin zarafin jinsi na kara yawa.
Ya ce, “Baya ga fyade, akwai wasu nau’ikan cin zarafi da ke shafar mutane ta fuskar tunani, zuciya, da kuma zamantakewa, musamman a inda ake watsi da hakkin iyali ko kuma hana su hakkokinsu.”
Ya kara da cewa irin wannan ma yana daga cikin nau’o’in cin zarafin jinsi.
“A cikin shekarar nan daga watan Janairu, ofishinmu na hakkin dan adam ya karbi sama da 1600 na korafe-korafen cin zarafi, wanda ya nuna karin kaso na 5-6% idan aka kwatanta da shekarun da suka gabata.”
Ya kuma jaddada cewa akwai bukatar hada kai tsakanin hukumomi, gwamnati, kungiyoyi da sauran masu ruwa da tsaki wajen yaki da wannan matsala.
“Dole a hada hannu da hukumomi, gwamnati da kungiyoyi don rage ko dakatar da cin zarafi,” in ji Shehu.
A cewar Haruna Kiyawa, Jami’in Hulda da Jama’a na rundunar ‘yan sanda (PPRO), GBV na daga cikin manyan matsalolin da ke shafar al’umma a yau.
“Rundunar ‘yan sanda ta kafa sassan musamman don daukar nauyin wannan lamari, tare da horar da ma’aikata, musamman mata, domin gudanar da bincike da kuma gurfanar da wadanda suka aikata laifi,” in ji Kiyawa.
Kiyawa ya kara da cewa, “ al’umma da su gaggauta kawo rahoton duk wani lamari da ya shafi cin zarafi ga hukumomin da suka dace, domin hana cigaba da yawaitar wannan mummunan al’amari.”
Taron ya ja hankalin al’umma da cewa dole ne ayi hanzarin kai wanda aka ci zarafinsa asibiti domin gudanar da gwaje-gwaje da tattara hujjoji da za su taimaka wajen gurfanar da wanda ya aikata laifin a gaban shari’a.
Kungiyar VOBSI ta shirya taron magance matsalar cin zarafi a Kano
