Kungiyar Daliban Najeriya ta Kasa, NANS, Yankin E, ta bawa gwamnatin tarayya sati biyu domin tura ‘yan kwangila zuwa wuraren aikin tituna hudu dake arewacin Najeriya da aka bada kwangilar su.
Wannan yana cikin wata sanarwa da Kwamred Umar Afkawa, Mai Kula da Yankin E, ya fitar, inda NANS ta dage cewa dolene ‘yan kwangila da ke kula da ayyukan su koma aiki nan take a wuraren da abin ya shafa, ko kuma gwamnatin tarayya za ta fuskanci zanga-zangar jama’a.
Sanarwar, wadda ta ayyana Alhamis a matsayin ranar fara wa’adin, ta lissafa ayyukan titunan da abin ya shafa, ciki har da titunan Numan-Gombe, Numan-Jalingo, Damaturu-Buni Yafi, da Biu-Garkida.
Afkawa ya kuma bayyana cewa kungiyar ta tilasta wa Ministan Ayyuka, David Umahi, ya samar da cikakken tsari na kammala wadannan ayyuka hudu, tare da kira ga gwamnatin tarayya da ta gano da magance dukkan matsalolin da ke hana ci gaban ayyukan.
Shugabancin kungiyar dalibai yayi alkawarin cewa, “Idan ba a cika wadannan bukatun cikin kwanaki 14 da aka kayyade ba, za a gudanar da zanga-zanga a jihohin Adamawa, Gombe, Taraba da Borno.
“Kungiyar za ta tura dalibai don neman a dauki mataki. Haka kuma, za ta tattauna da masu ruwa da tsaki don kara jaddada damuwar.”
NANS ta baiwa FG kwanaki 14 don gyara titunan Adamawa da Borno
