Tsohon ɗan shugaban ƙasa na jam’iyyar LP, Peter Obi, ya yi kira ga gwamnati da ta dauki matakai masu tsauri kan shugabannin da ke cin hanci a Najeriya.
Obi ya bayyana hakan ne a wata sanarwa da ya fitar yau Talata, yayin bikin ranar yaƙi da cin hanci ta duniya.
A cewar Obi, cin hanci ya dabaibaye dukkan matakan gwamnati a Najeriya tsawon shekaru, wanda hakan ya jefa ƙasar cikin mawuyacin hali, musamman ta fuskar tattalin arziki da basussuka.
Ya ce ci gaba da ciyo bashi mara tsari yana dagula rayuwar al’umma da daƙile bunƙasar tattalin arziki.
Tsohon gwamnan jihar Anambra ya shawarci shugabanni da su zama masu gaskiya, su kuma guji cin hanci da rashawa.
Ya ce Najeriya na ɗaya daga cikin ƙasashen da ke cikin jerin ƙasashe mafi cin hanci a duniya, inda ta ke matsayi na 145 cikin 180, lamarin da ke hana ci gaba.
Obi ya bayyana cewa ƙasar na cikin ƙasashen Afrika 11 da ke fama da rashin kyawun shugabanci a cikin shekaru goma da suka gabata, wanda ya janyo koma baya wajen samun cigaba mai dorewa.
Ya ce babu wata hanya ta cigaba face a magance matsalar rashawa da kyau.
Tsohon ɗan takarar ya ja hankalin shugabanni da al’umma baki ɗaya kan muhimmancin yaƙi da cin hanci, yana mai cewa hakan ne kawai zai bai wa Najeriya damar tsayawa daram a fagen bunƙasa tattalin arziki da cigaba na gari.
Obi ya nemi a ɗaure shugabanni da aka kama da rashawa a Najeriya
