Sanatoci 16 daga yankin Kudu-maso-Kudu sun yi alkawarin ba da goyon bayansu ga kudirin sake fasalin haraji.
Bayan wani zama da suka yi a ranar Larabar da ta gabata, a cikin wata sanarwar da Sanata Seriake Dickson da Sanata Jarigbe A. Jarigbe suka sanya wa hannu, sun jaddada aniyarsu na tabbatar da majalisar ta zartar da dukkan kudurin da zai kawo zaman lafiya da ci gaban kasar nan.
Rahoton bayan taron da suka fitar ya bayyana, “Mun fahimci mahimmancin sake fasalin haraji wajen inganta kudaden shiga na kasa da kuma samar da daidaiton tattalin arziki, mun yanke shawarar tallafawa kudirorin sake fasalin haraji.”
“Marawa kudirorin baya ya biyo cikakken nazari kan kudirin don tabbatar da cewa sun yi daidai da muradun ‘yan Najeriya baki daya, musamman ma jin dadin yankin Kudu-maso-Kudu.” rahoton ya jaddada.
Kungiyar sanatocin ta kuma bukaci a guji yunkurin cusa kabilanci da bangaranci a cikin tattaunawar sauyin fasalin harajin sun kuma ce a shirya suke su shiga a dama da su akan dukkan tattaunawar da ta shafi sauyin fasalin harajin.
Sanatocin yankin Kudu maso Kudu sun marawa kudirin sauya fasalin haraji baya
