Shugaba Bola Ahmed Tinubu zai sake tsayawa takara don wa’adi na biyu a zaben 2027, in ji mashawarcinsa na musamman kan harkokin sadarwa da kafofin yada labarai, Mista Daniel Bwala.
Ya kara da cewa ba kawai Shugaban zai tsaya takara a zaben shugaban kasa na 2027 ba, har ma zai ci zabe.
Bwala ya bayyana hakan ga manema labarai a hedikwatar kasa ta jam’iyyar APC) a ranar Laraba a Abuja.
Mista Bwala ya yi watsi da jita-jitar da ke cewa abin da ya faru a Ghana, inda jam’iyyar da ke mulki ta sha kaye a hannun jam’iyyar adawa, na iya faruwa a zaben gaba na Najeriya.
Ya yi bayanin cewa Shugaba Tinubu, wanda ya fi mayar da hankali kan cika alkawuransa ga ‘yan Najeriya, ba zai bari ‘yan adawa su dauke masa hankali ba.
“Ya maida hankali sosai kan abubuwan da suka shafi rayuwar ‘yan Najeriya, don tabbatar da cewa mutane sun fita daga yunwa, don tabbatar da cewa harkar noma ta kawo sauyi, da kuma tabbatar da cewa mutanenmu za su iya magance matsalolin da ke fuskantar su a kullum. Don haka, lokacin yin siyasa bai yi ba tukuna, amma idan lokacin ya yi, za mu shirya sosai don fuskantar kowa,” in ji shi.
Ya tabbatar da cewa ayyukan Shugaba Tinubu za su kara masa farin jini a idon masu zabe, wanda hakan zai tabbatar da samun nasarar wa’adi na biyu.
Tinubu zai sake tsayawa takara a 2027 – Bwala
