Rundunar ’yan sandan Jihar Kano ta kama wasu mutum uku da aka samu da jabun kuɗi na kimanin Naira biliyan 129.
Kakakin rundunar, SP Haruna Kiyawa, ya bayyana hakan a ranar Talata, Inda ya ce kuɗaɗen jabun sun haɗa da Dalar Amurka, CFA, da kuma Naira.
A cewar Kiyawa, jimillar jabun kuɗin da aka kama sun haɗa da dala 3,366,000, CFA 51,970,000, da Naira 1,443,000. Ya bayyana cewa tuni rundunar ta cafke waɗanda ake zargi.
Hakazalika, rundunar ta ƙwato wasu kayayyaki daga hannun waɗanda ake zargi, wanda suka haɗa da harsasai guda shida, Adaidaita Sahu guda uku, babura guda takwas, da kuma jakunkuna uku cike da tabar wiwi.
Sauran abubuwan da aka ƙwato sun haɗa da ƙwayoyi 250 na diazepam, tumaki 278, da shanu bakwai.
SP Kiyawa ya ƙara da cewa rundunar tana ci gaba da magance manyan laifuka kamar garkuwa da mutane, fashi da makami, safarar miyagun ƙwayoyi, da rikicin daba a jihar.
Yan sanda sun kama mutum uku da jabun kuɗin naira biliyan 129 a Kano
